Italiano

russia-flag.gif (919 byte)
Russian

Pro connoschere Poggio dei Pini

Chie semus

Sa cussorgia

Sa natura

Sas associatziones Mapas

  S'istoria de sa idda
de Ignaziu Lecca


English

S'attu pro sa fundassione de sa 'idda noa est istadu frimmadu su 27 de Triulas de su 1966 cun sa frummascione de sa Coperativa "Sotziedade Cooperativa Poggio dei Pini arl" in s'apposentu mannu de s'albergo Excelsior de Casteddu.
Su numene "Poggio dei Pini" bi lu deit s'avvocadu Elia Marracini. S'attu est frimmadu dae sos sotzios fundadores : chi fini: Alberto Marracini, Ettore Lai (su primu presidente), Alfredo Sotgia, Giorgio Mundula, Pierluigi Monni, Silvio Alvito, Giampiero Atzori, Vittorio Mungianu, Giovanni Manca, Salvatore Congia, Giovanni Mandas, Salvatore d'Errico.
 

Vista del lago 
Su primu Consizu de Amministradores de sa Coperativa Poggio dei Pini

S'istoria de su Poggio est perņ comintzada prima meda de sa die 'e sa frimma. In incomintzu 'e annu, in su 1966  sos doghi fundadores de sa coperativa  si ponzeini a chircare un postu chi aeret appidu tzertos particulares pro bi poder fraigare sa 'idda chi aian in mente. Agattadu su logu si ponzeini a chircare atteros sotzios. Onzunu nde faeddeit chi sos chi connoschiana a cussos chi pariana interessados. In pagu tempus si frommeit unu bellu gruppu. Ma si fit solu a s'incominzu. Como su lugu cheriat comporadu. Su postu fit una tanca de propriedade de sos eredes de Donna Maria Saggiante, dughentos ottantabattor ettaros in sa cussorgia de Cabhuderra. Sa Coperativa ponzeit sa sede in Casteddu in via Alighera 31.
Fatta sa sotziedade cun tottu sos apparados burocraticos, in su mese de santu Aini de su 1966, si deit s'incaricu a su ingegneri Pierluigi Monni de istudiare su modu de comente si podiat faghere sa 'idda noa. Su disegnu fit de fraigare, a su tempus, solu sa zona de Pauli Ara e de sa Birdiera. Su disegnu isteit presentadu in omune de Cabhuderra in sos ultimos meses de s'annu 1967. De sa relascione chi accumpanzaiat su disegnu nde copio como carchi paraula:
"S'interessu nostru pius mannu fit cussu de faghere cantu  pius possibile pro no guastare su logu cun fraigos chi non si seren adatados bene cun sa natura. Tottas duas sa zonas chi devimus fraigare hana unu bellu buscu in cumone chi cuberini sas alturas de Pauli Ara e de sa Birdiera. Sas domos chi amus de fraigare deven   essere comente chi sian fraigadas in campagna. Sas duas zonas han' a faghere lacana tra issas cun duna serie de domos de tottu postas tra su lagu, su riu, e unu fila de alvures. Custu bloccu de fraigos in cumone at de essere unu logu inue sa zente de sa 'dda recuit pro faghere amicizia, connoschentzias, e ispesas. Unu logu inue si podet passare su tempus chi nos restat dae su tribagliu."
In su 1967 b'enzeit fundadu su "Comitadu Isportivu" in s'annu mantessi incomintzeini sos trabaglios pro preparare sa 'idda noa. In su 1968 benziet comporadu unu loto de ses ettaros affacca a mare in localidade Villa d'Orri. Isteit incorporada sa sotziedade Belga "SPA Sant'Alvara" chi fit de treghentos ettaros. Tra su 1967 e su 1971 benzeini appruvados varios regulamentos edilizios e internos a sa 'idda. E gai, in su 13 de abrile de su 1970 su sotziu Angioni piatzeit sa prima pedra. Impare a sos trabaglios de urbanizascione s'incomintzeit puru a fraigare carchi domo. Una die de no ismentigare pro su Poggio est sa die de s'inagurascione de su cunduttu 'e s'aba, su 28 'e Maju de su 1972. Su 27 de Santu Aini de s'annu mantessi si battijeit s'iscola elementare cun una classe fatta dae otto piseddos. Unu postu 'e meritu lu devimus dare a su sotziu Mario Gabba chi isteit su primu chi sinde'enzeit a istare in su Poggio. Fit su deghe de jennarzu de su 1973 e, a sa fine de s'annu, fin gia 14 sas famiglias chi sinde fin bennidas a istare in sa 'Idda noa.
In su 1974, sa Coperativa detzidet de illargare a ispesas suas sas carreras chi intrana in sa 'idda, illargadas e isfaltadas a modu chi sos chi 'enini a sa 'idda noa appana un'intrada comente si toccada.
Sa 'idda creschet chi su passare de su tempus e creschene sos sevissios:tra su 1975 e su 76 intrana in funzione s'iscola pro sos minoreddos, unu circulu sotziale e una capella, tottu collocados in modu provvisoriu in sos dominarios betzos de sa tanca. E in cussos annos mantessi incomintzemus a fraigare sa pischina pro nadare e una palestra cuberta. E fintzas in 1978 si fatteini cosas meda. Sa prima die de Abrile , sa ditta Dedoni deit iniziu a unu servissiu
pro traspurtare sa zente tra Casteddu e su Poggio. Fintzas a tando su servissiu fit istadu fattu dae unu pulminu de su Comitadu Isportivu. Sa capella de su Poggio diventat una parocchia. S'arcivescovo de Casteddu, infattis istitueid sa parocchia de "Sa Beada Vergine Mamma 'e sa Cheija". Sa parocchia noa fit cumposta dae sa 'idda 'e su Poggio dae sa residenzia de "Sa Madalena, Frutti d'oro e Su Loi. Dae poi su Poggio isteit fatta parocchia a sa sola e benzeit intitolada a "Sa Beada Vergine de Lourdes".
Benzeini anno de tribagliu pro tottu. Su centru sigheit a creschere, operas noas sinde fatteit guasi onzi die tottu pro su bene de sa 'idda mantessi. In su 1980 si fatteit s'impiantu pro pulire s'aba de su lagu e si fraigheit un'iscola noa pro sos piseddos minores e in 1981 s'iscola media. In sos annos 1981/82 s'incomintzeini sos trabaglios pro fraigare su Club House e su Centru
Cummerciale. Poi s'isfalteini tottu sas carreras intro 'e sa 'isdda e si bi ponzeini sos lampiones.
Dae pagu, in su mese de Martu de su 1997 amus inauguradu sa cheija noa intitolada a Sa beada Vergine de Lourdes.

(tramunu de Giovanni Falconi)


 

 

Linea Poggio © 1997-1999 - Responsabile: Giorgio Plazzotta
I contenuti appartengono ai rispettivi autori - Tutti i diritti riservati
The contents belong to the respective authors - All rights reserved